ბათუმში მიკროავტობუსს ცეცხლი გაუჩნდა, რის შედეგადაც ერთი ადამიანი დაშავდა. იგი სასწრაფო-სამედიცინო დახმარების ბრიგადამ ბათუმის რესპუბლიკურ საავადმყოფოში გადაიყვანა. ექიმების ინფორმაციით, პაციენტის მდგომარეობა დამაკმაყოფილებელია. მას დაზიანება ფეხის არეში აღნიშნება.
თვითმხილველების ინფორმაციით, ხანძარი თავდაპირველად მიკროავტობუსს გაუჩნდა, რომელიც მთლიანად დაიწვა, შემდეგ კი მსუბუქ ავტომობილზე გავრცელდა.
მათივე თქმით, შემთხვევის დროს მიკროავტობუსში ორი პირი იმყოფებოდა, რომლებმაც გადმოსვლა მოახერხეს. ფაქტზე, საქართველოს შინაგან საქმეთა სამინისტროს თანამშრომლებმა გამოძიება დაიწყეს. ხანძარი ამ დროისათვის ლიკვიდირებულია.
