ქუთაისში, მედიის წარმომადგენლები იუსტიციის მინისტრთან გარდაცვლილი ოპერატორის ლექსო ლაშქარავას ფოტოებით დახვედრას გეგმავდნენ, თუმცა დაგეგმილი ღონისძიება დათქმულ დროს არ შედგა. მინისტრ რატი ბრეგაძესა და ქუთაისის მერს შორის მემორანდუმის ხელმოწერა გადაიდო.
მიუხედავად ამისა, მედიის წარმომადგენლებმა მდუმარე პროტესტი მაინც გამოხატეს.
“დღეს, ამ დარბაზში იუსტიციის მინისტრს ხელი უნდა მოეწერა მემორანდუმისთვის, თუმცა ალბათ, ის მიხვდა, რომ აქ ჟურნალისტები დისკომფორტს შეუქმნიდნენ. ამიტომ მინისტრის დღის წესრიგი შეიცვალა. ჩვენ ვამბობთ, რომ ხელისუფლება, ჟურნალისტებს არათუ არ იცავს მოძალადე ჯგუფებისაგან, არამედ თავად წაახალისებს მათ. ირაკლი ღარიბაშვილი უნდა გადადგეს, მოხალადე ჯგუფები უნდა დაისაჯონ”, - განაცხადა „ფორმულას“ ჟურნალისტმა ეკა ფხაკაძემ.