რუსეთის პრეზიდენტი ვლადიმერ პუტინი აზერბაიჯანელ კოლეგას, ილჰამ ალიევს 20 ივლისს მოსკოვში შეხვდება, - ინფორმაციას რუსული მედია კრემლის პრესსამსახურზე დაყრდნობით ავრცელებს.
„20 ივლისს მოსკოვში გაიმართება მოლაპარაკებები რუსეთის პრეზიდენტ პუტინსა და აზერბაიჯანის რესპუბლიკის პრეზიდენტ ალიევს შორის, რომელიც სამუშაო ვიზიტით რუსეთს ეწვევა. დაგეგმილია რუსეთ-აზერბაიჯანის სტრატეგიული პარტნიორობის ურთიერთობების შემდგომი გაძლიერების ძირითადი საკითხების განხილვა. აქცენტი გაკეთდება ვაჭრობაზე, ინვესტიციებსა და ჰუმანიტარულ თანამშრომლობაზე”, - ნათქვამია კრემლის პრესსამსახურის ინფორმაციაში.
მათივე ცნობით, გარდა ამისა, ლიდერები აქტუალურ რეგიონალურ პრობლემებსაც განიხილავენ.
„ძირითადი ყურადღება დაეთმობა ყარაბაღის საკითხზე რუსეთის, აზერბაიჯანისა და სომხეთის ლიდერების მიერ 2020 წლის 9 ნოემბერსა და 2021 წლის 11 იანვარს ხელმოწერილი შეთანხმებების შესრულების პრაქტიკულ ასპექტებს“, - აცხადებენ კრემლის პრესსამსახურში.