ჯანდაცვის სისტემა ჩიხშია, დამნაშავე ხელისუფლებამ მოქალაქეები კოვიდის წინაშე მარტო დატოვა, - ამის შესახებ „ნაციონალური მოძრაობის“ წევრმა გიორგი ხვედელიანმა განაცხადა.

მისივე თქმით, საქართველოს ხელისუფლება პანდემიის პერიოდშიც კი ვერ ამბობს უარს „ხელის მოთბობაზე".

„დღეს მთელი პასუხისმგებლობა მოქალაქეებზეა გადატანილი. მოსახლეობის აცრის პროცესს თითქმის ვერ უზრუნველყოფს სახელმწიფო, ვერც საინფორმაციო დონეზე, ვერც ტექნიკურად. არ გვაქვს სათანადო რაოდენობის ვაქცინა და რაც გვაქვს, ისიც მისტიკურად ქრება. ვაქცინაციაზე რეგისტრაციისთვის შექმნილი პორტალი ვერ გაიმართა, მიუხედავად კოვიდფონდისათვის მიღებული მილიარდებისა. საავადმყოფოებში ელემენტარულ კვლევებზე მისული ადამიანების ინფიცირებულთაგან იზოლირებას ვერ ახერხებენ და საავადმყოფოები ვირუსის გავრცელების მთავარი კერა ხდება. წელიწადნახევრიანი გამოცდილების მიუხედავად, ქვეყანაში გვაქვს სიკვდილიანობის გამორჩეულად მაღალი მაჩვენებელი. ხელისუფლება საყოველთაო საფრთხის წინაშეც ვერ ამბობს უარს ხელის მოთბობაზე, რაც შარშანვე ცხადი გახდა, როდესაც ვითომ პირბადეები შეკერეს. ჯანდაცვის სისტემა ჩიხშია, დამნაშავე ხელისუფლებამ მოქალაქეები კოვიდის წინაშე მარტო დატოვა. აუცილებელია მაქსიმალურად ვმობილიზდეთ და თავი დავიცვათ", - განაცხადა ხვედელიანმა.