აჭარაში ეპიდსიტუაცია ნელ-ნელა უარესდება. ბოლო დღეების განმავლობაში დადებითობის მაჩვენებელი 3% - ზე მაღალი გვაქვს, - ამის შესახებ აჭარის საზოგადოებრივი ჯანდაცვის ცენტრის დირექტორის მოადგილე ნონა ეფაძემ ჟურნალისტებს განუცხადა.

მისი თქმით, რეგიონში კორონავირუსით ინფიცირების შემთხვევებმა საგრძნობლად მოიმატა, რის გამოც მოქალაქეებს რეკომენდაციის დაცვისა და ვაქცინაციის ჩატარებისკენ მოუწოდებს.

„მომატებულია აქტიური შემთხვევების რაოდენობა და 1300-ზე მეტია, აქედან 300-ზე მეტი კლინიკაშია მოთავსებული.

ეპიდსიტუაციისთვის მნიშვნელოვანია რეგულაციების დაცვა და ვაქცინაციის პროცესი, რომელიც ბოლო დღეებში გაუმჯობესებულია", - აცხადებს ნონა ეფაძე.

ბათუმის სამშობიარო სახლის ინფორმაციით, კლინიკაში 14 კოვიდ ინფიცირებული ფეხმძიმე არის მოთავსებული. მათივე ინფორმაციით, ორსულების მდგომარეობა სტაბილურია, თუმცა ერთი მათგანი საყურადღებოა, რომელიც ჟანგბადს საჭიროებს.