ხობის მუნიციპალიტეტის სოფელ ხეთაში უხვმა ნალექმა პრობლემები შექმნა. დატბორილია ეზოები, ქუჩები, სავარგულები.
ცენტრალურ მაგისტრალზე რამდენიმე წუთით მოძრაობა შეფერხებული იყო.
ადგილზე მერიის შესაბამისი სამსახურები იმყოფებიან და ვითარებას ეცნობიან.
„ამ ეტაპზე მოსახლეობიდან ზარალზე ინფორმაცია არ გვაქვს. დავდივართ და ადგილზე ვეცნობით ვითარებას. ძირითადად დაზიანებულია ხრეშ-ღორღიანი ქუჩები, დატბორილია ეზოები. იმდენად ძლიერი წვიმა იყო, რომ სანიაღვრე არხებმა ვერ გაატარა", - განუცხადა „ინტერპრესნიუსს" ხობის მუნიციპალიტეტის მერის წარმომადგენელმა ხეთის ადმინისტრაციულ ერთეულში შავლეგ ბუკიამ.