ევროპის ქვეყნებიდან ბათუმის მიმართულებით ფრენების რაოდენობა იზრდება. ჩარტერული ფრენები ბათუმის საერთაშორისო აეროპორტს ამჯერად, ტალინიდან დაემატა. ესტონეთის დედაქალაქიდან პირველ ჩარტერს ბათუმის საერთაშორისო აეროპორტში 150-ზე მეტი ტურისტი ჩამოყვა. აღნიშნულ ინფორმაციას აჭარის ტურიზმის ადმინისტრაცია ავრცელებს.

აჭარის ტურიზმის ადმინისტრაციის ინფორმაციით, ჩარტერული ფრენები "ტალინი-ბათუმი-ტალინი" კვირაში ერთხელ სექტემბრის ბოლომდე განხორციელდება. ტალინთან ერთად, ჩარტერული ფრენები ბათუმში ვილნიუსიდანაც ხორციელდება. ბალტიისპირეთიდან ბათუმის მიმართულებით ჩარტერები პირველად 2019 წელს დაიწყო. მას ორგანიზებას ტურისტული კომპანია "აჭარა ტური" უწევს.

უწყება განმარტავს, რომ 2021 წლის ივლისში, ბათუმში 480 საერთაშორისო ფრენა განხორციელდა, რაც გასული წლის ანალოგიურ მაჩვენებელთან შედარებით 60 - ჯერ, ხოლო 2019 წლის მონაცემთან შედარებით 36.36 %-ითაა გაზრდილი. მგზავრთა საერთო ნაკადი გაზრდილია 20.15%-ით.