„ერთიანი ნაციონალური მოძრაობის“ წევრის, თინა ბოკუჩავას განცხადებით, მან მაგისტრატი მოსამართლის წინაშე ე.წ. ფარული ჩანაწერების ავთენტურობა დაადასტურა, რომელიც მას ეხებოდა.
როგორც დაკითხვიდან გამოსვლის შემდეგ ბოკუჩავამ აღნიშნა, ის თავს დაზარალებულად მიიჩნევს, თუმცა, იმის იმედი, რომ გამოძიება დამკვეთებს გამოავლენს, არ აქვს.
"ძირითადად ავთენტურობასთან დაკავშირებით იყო კითხვები. მოგეხსენებათ, როგორც პარლამენტის წევრს, სისხლის სამართლის საპროცესო კოდექსი მაძლევს უფლებას, რომ წყარო არ გავამჟღავნო, ვინც აღნიშნული ამონარიდი მომაწოდა. აღნიშნული ამონარიდი, ავთენტურობა დავადასტურე, რაც მაძლევს საფუძველს იმისთვის, რომ ჩემი ტელეფონი ისმინებოდა, თავს ვგრძნობ დაზარალებულად და მოვითხოვ გამოძიებას. ამ გამოძიების იმედი ძალიან რთულია, რომ ქონდეს ადამიანს, რომელსაც ივანიშვილი იყენებს დევნის ინსტრუმენტად. ძალიან დაბალია იმის შანსი, რომ აღნიშნული გამოძიება გავიდეს დამკვეთებზე და შემსრულებლებზე. ჟურნალისტებისთვისაც კი არის ცნობილი იმასთან დაკავშირებით, თუ ვინ ფიგურირებდა ამ მოსმენებში, მაგრამ აქ საუბარი არ არის მხოლოდ იმ პირებზე, ვინც ყურსასმენით იჯდა მოსმენის აპარატურასთან. პრინციპულად მნიშვნელოვანია, რომ გამოიკვეთოს დამკვეთი, რაშიც მე დარწმუნებული ვარ, რომ არის ამ ქვეყნის მბრძანებელი ივანიშვილი",- განაცხადა ბოკუჩავამ.
იხილეთ ვიდეო:თინა ბოკუჩავამ მაგისტრატი მოსამართლის წინაშე ე.წ. ფარული ჩანაწერების ავთენტურობა დაადასტურა, რომელიც მას ეხებოდა