აჭარაში დამეწყრილი გზები იწმინდება
აჭარაში დამეწყრილი გზები იწმინდება. ამის შესახებ ინფორმაციას აჭარის მთავრობა ავრცელებს.
როგორც ცნობილია, ძლიერი წვიმის შედეგად მეწყრული პროცესები ბათუმში, ასევე ხელვაჩაურისა და ქობულეთის რამდენიმე სოფელში განვითარდა.
საავტომობილო გზების დეპარტამენტის ტექნიკა, ასევე მერიის ყველა სამსახური მობილიზებულია და საგანგებო რეჟიმში მუშაობს.
"აჭარის მთავრობის თავმჯდომარის თორნიკე რიჟვაძის დავალებით, აჭარის მთავრობის აპარატის უფროსი ჯაბა სურმანიძე ხელვაჩაურისა და ქობულეთის სოფლებში დამეწყრილი გზების გაწმენდით სამუშაოებს ადგილზე გაეცნო. მასთან ერთად იმყოფებოდა აჭარის საავტომობილო გზების დეპარტამენტის უფროსი ზაზა შავაძე.
უხვმა ნალექმა ზიანი აჭარის სამ მუნიციპალიტეტს მიაყენა. დაიტბორა ბათუმი, ხოლო მეწყრული პროცესები ქობულეთსა და ხელვაჩაურში განვითარდა. ძირითადი მიმართულებები უკვე გაწმენდილია, ხოლო დარჩენილი მონაკვეთების გაწმენდა ეტაპობრივად დასრულდება.
24 საათიან რეჟიმში მუშაობას განაგრძობს ყველა შესაბამისი სამსახური", - ნათქვამია ინფორმაციაში.
