„ქუთაისის თანაბარი განვითარება ტურისტებისთვის აუცილებლად სანახავი ქალაქების ტოპშვიდეულში მოხვედრის მნიშვნელოვანი პირობაა”,- ამის შესახებ პარტია“ ქართული ოცნება- დემოკრატიული საქართველოს“ ქუთაისის მერობის კანდიდატმა იოსებ ხახალეიშვილმა განაცხადა, რომელიც უქიმერიონისა და გუმათის ადმინისტრაციული ერთეულის მოსახლეობას შეხვდა.

მერობის კანდიდატმა იმ ინფრასტრუქტურულ პროექტებზე ისაუბრა, რომელიც ქალაქის განვითარების გეგმაში აღნიშნულ ადმინისტრაციულ ერთეულშია გათვალისწინებული. მან ისაუბრა გაზრდილი ბიუჯეტის (91,ლნ ლარი) მნიშვნელობაზეც, რომელიც ქალაქის იერსახეს უნდა მოხმარდეს და საბოლოო ჯამში, თითოეული თანაქალაქელის კეთილდღეობაზე აისახოს.

მისი თქმით, ქუთაისი არა მარტო განათლებისა და კულტურის სტატუსს დაიბრუნებს, არამედ ტურისტულ ჰაბად იქცევა. მერობის კანდიდატის თქმით, მის გეგმაშია, ტურისტებისთვის საინტერესო და მიმზიდველი ადგილების შექმნა და შესაბამისი ინფრასტრუქტურით უზრუნველყოფა თითოეულ ადმინისტრაციულ ერთეულში და არა მხოლოდ ქალაქის ცენტრალურ უბნებში.

„ქუთაისის თანაბარი განვითარება, ტურისტებისთვის საინტერესო ქალაქთა ტოპშვიდეულში მოხვედრის მნიშვნელოვანი პირობაა. ქალაქიდან გამგზავრებულ ტურისტებს ჩვენს ქალაქში მეორედ ჩამოსვლის სურვილი უნდა უჩნდებოდეთ. კეთილმოწყობილი სკვერები, რეკრეაციული ზონები, საფუძვლიანად რეაბილიტირებული გზები, მოწესრიგებული უბნები, ახალგაზრდული სივრცეები, მრავალფეროვანი გასართობები და ატრაქციები, რაც დაგეგმილია, ჩვენს ქალაქს არა მარტო ადგილობრივი მოსახლეობისთვის გახდის უფრო კომფორტულს და სასურველს, არამედ სტუმრებისთვისაც. ქუთაისი უნდა ვაქციოთ ტრადიციებისა და ინოვაციების ქალაქად, რომელშიც თითოეული თქვენგანის ინიციატივა და თანამონაწილეობა მნიშვნელოვანია“, - განაცხადა იოსებ ხახალეიშვილმა.

როგორც პრესსამსახურში აღნიშნავენ, წელს პირველად უქიმერიონისა და გუმათის ადმინისტრაციული ერთეულები ერთ საარჩევნო ოლქად გაერთიანდა.