ლანჩხუთის მუნიციპალიტეტში ძლიერმა წვიმამ პრობლემები შექმნა. რამდენიმე ადმინუსტრაციულ ერთეულში მეწყრული პროცესები განვითარდა. ჩახერგილია საავტომობილო გზები. სოფელ ომფარეთში, სადაც 40-მდე ოჯახი ცხოვრობს, გადაადგილების პრობლემები შეიქმნა.

ადგილობრივი ხელისუფლების ინფორმაციით, გეოლოგიური დასკვნის საფუძველზე დაიგეგმება, თუ რა სახის სამუშაოები გახდება საჭირო. მათივე თქმით, შექმნილია სპეციალური კომისია, რომელიც ზარალის ოდენობას შეისწავლის.

„თვალნათლივ ჩანს, რომ მეწყრული ზონაა. 2-3 დღეა გადაუღებლად წვიმს. ასეთი ძლიერი წვიმა ალბათ, კარგა ხანია არ გვინახავს. რაც შეეხება ტერიტორიას, მთაგორიანია და მეწყრული ზონაა, წვიმამ უფრო დაალბო და განვითარდა მეწყერი. მოსახლეობა ყურადღების ქვეშაა. მუნიციპალიტეტს ყველანაირი პირობები აქვს შექმნილი და თუკი გადაადგილება, სასწრაფო დახმარება დასჭირდებათ, ეს არაა პრობლემა. ალტერნატიული გზაც არსებობს, ცოტა შორსაა. შესაბამისი სამსახურები, როცა შეისწავლიან, კერძოდ გეოლოგიური დასკვნაა დასადები, იქამდე მუნიციპალიტეტი ადგილობრივი ძალებით, ვეცდებით, რომ შესაბამისი დახმარება გავუწიოთ სოფელს და ეს გზა რაღაცნაირად აღვადგინოთ, სანამ მოხდება მთლიანად ამ გზის გეოლოგიური დასკვნით აღდგენა“, - განაცხადა ლანჩხუთის მერის მოადგილე ბიძინა იმნაიშვილმა.