მიხეილ სააკაშვილი მოსახლეობას პირდებოდა, რომ რეფერენდუმზე ჩამოვიდოდა. ჩვენც სოციალური ქსელით შევიტყვეთ მისი ჩამოსვლის შესახებ, - ამის შესახებ ბათუმის ოპოზიციური პარტიების მერობის საერთო კანდიდატმა გიორგი კირთაძემ „ინტერპრესნიუსთან" საუბრისას განაცხადა.

მისი თქმით, მიხეილ სააკაშვილი როგორც მოსახლეობას დაპირდა, საქართველოშია.

„როგორც თქვენ, ისე შევიტყვეთ ჩვენც, სოციალური ქსელით. იგი პირდებოდა მოსახლეობას და შეასრულა ჩამოსვლის დაპირება. ჩვენ ჯერჯერობით კომუნიკაცია არ გვქონია, სხვა ვერაფერს გეტყვით, ველოდებით არჩევნებს და დიდ გამარჯვებას“, - აცხადებს კირთაძე.

შეგახსენებთ, საქართველოს ყოფილი პრეზიდენტი მიხეილ სააკაშვილი ვიდეოს აქვეყნებს და აცხადებს, ბათუმში იმყოფება.

„ეს არის ბათუმი. 2 ოქტომბერს უნდა მივიდეთ არჩევნებზე, მივცეთ ხმა „ნაციონალურ მოძრაობას“ და არავითარ შემთხვევაში არც ივანიშვილს, არც გახარიას. აქ უნდა ყოფილიყო ბათუმის ტექნოლოგიური უნივერსიტეტი, რომელიც გაანადგურეს. ხომ ხედავთ, ყველაფერი გავრისკე. ისე მენატრებოდა აქაურობა. დღეს არის ჩემი ოცნების აღსრულება“, - აცხადებს ვიდეომიმართვაში მიხეილ სააკაშვილი.