“ეიპიემ ტერმინალს ფოთი“ ინფორმაციაზე, ქვეყანაში მიხეილ სააკაშვილის ფოთის ნავსადგურის გავლით შემოსვლის შესახებ, განცხადებას ავრცელებს
"კორპორაცია ფოთის საზღვაო ნავსადგური" მედიაში გავრცელებულ ინფორმაციას, ქვეყანაში საქართველოს ყოფილი პრეზიდენტის მიხეილ სააკაშვილის ფოთის ნავსადგურის გავლით შემოსვლის შესახებ განცხადებას ავრცელებს.
განცხადების თანახმად, ,,კორპორაცია ფოთის საზღვაო ნავსადგური" (ეიპიემ ტერმინალს ფოთი) არ ფლობს დადასტურებულ ინფორმაციას აღნიშნულ საკითხთან დაკავშირებით.
"აქვე, ხაზგასმით აღვნიშნავთ, რომ ფოთის საზღვაო ნავსადგური ნავსადგურის ტერიტორიაზე შემომავალი ან გამავალი ტვირთის და მისი თანმხლები პირების შემოწმებაზე უფლებამოსილი და შესაბამისად, პასუხისმგებელი არ არის. აღნიშნული პროცესი სრულად კონტროლდება და იმართება შესაბამისი სახელმწიფო უწყებების მიერ.
„რაც შეეხება გავრცელებულ ინფორმაციას ჩვენი ორი თანამშრომლის დაკავების ფაქტის შესახებ, ჩვენ ველოდებით საგამოძიებო ორგანოების მხრიდან ოფიციალურ ინფორმაციას. აქვე, სრულ მზადყოფნას გამოვთქვამთ, მოთხოვნისამებრ ვითანამშრომლოთ სამართალდამცავ ორგანოებთან”, - აღნიშნულია განცხადებაში.
