თვითმმართველობის არჩევნების მეორე ტურში ნეიტრალიტეტი არ არსებობს. შენ მხარს უჭერ ოპოზიციას და ამით შენი წვლილი შეგაქვს ხელისუფლების დამარცხებაში, ან არ უჭერ მხარს ოპოზიციას და ამით ეხმარები ხელისუფლებას, რომ დარჩეს, - ასე აფასებს პოლიტიკოსი დავით ბაქრაძე გიორგი გახარიას განცხადებას, რომ არჩევნების მეორე ტურზე მხარს არც „ქართულ ოცნებას“ და არც „ნაციონალურ მოძრაობას“ დაუჭერენ.

როგორც ბაქრაძე განმარტავს, გიორგი გახარია ოპოზიციაში ვერ იქნება სანამ არ ჩამოყალიბდება მყარად, რომ მონაწილეობს ხელისუფლების შეცვლის პროცესში.

„მე მიმაჩნია, რომ მეორე ტურში ნეიტრალიტეტი არ არსებობს. შენ მხარს უჭერ ოპოზიციას და ამით შენი წვლილი შეგაქვს ხელისუფლების დამარცხებაში, ან არ უჭერ მხარს ოპოზიციას და ამით ეხმარები ხელისუფლებას, რომ დარჩეს. მეორე ტურში ნეიტრალიტეტი არ არსებობს. ვფიქრობ, ამას ძალიან სწორად აფასებენ ამომრჩევლებიც. ვფიქრობ და დარწმუნებული ვარ, რომ ეს გადაწყვეტილება დიდი ზიანის მომტანი იქნება ბატონი გახარიას გუნდისთვის, მისი ამომრჩევლის და ნიშის გამყარების თვალსაზრისით. ბატონი გახარია დღეს ხელისუფლებაში აღარ არის, მაგრამ ის ვერ იქნება ვერც ოპოზიციაში, მანამ სანამ არ ჩამოყალიბდება მყარად, რომ მონაწილეობს ხელისუფლების შეცვლის პროცესში.

ამის ერთ-ერთი მთავარი ტესტი გახლავთ სწორედ ის, მზად არის თუ არა მეორე ტურში მხარი დაუჭიროს ოპოზიციას დამოუკიდებლად, მიუხედავად იმისა მოსწონს თუ არა ნიკა მელია და სხვა კანდიდატები. მეორე ტურის გადაწყვეტილება არ არის ოპოზიციის მოწონების გადაწყვეტილება. მეორე ტურის გადაწყვეტილება არის ხელისუფლების შეცვლა - არშეცვლის საკითხი. ამიტომ არის გადამწყვეტი მნიშვნელობის ვინ რა პოზიციას დაიკავებს“, - აღნიშნავს ბაქრაძე.