მცხეთის საოლქო საარჩევნო კომისიაში საჩივრების განხილვის პროცესი მიმდინარეობს.

საჩივრები არასამთავრობო ორგანიზაციების - "ახალგაზრდა იურისტთა ასოციაცია", "სამართლიანი არჩევნები" და ორგანიზაცია "2020-ის" მიერაა შეტანილი, რომლებიც #18 უბნის სრულად, ხოლო #21 უბანზე ბათილი ბიულეტენების გადათვლას ითხოვენ.

"დღის წესრიგში გვაქვს ორი - #21 მცხეთის და #18 საარჩევნო უბნების საკითხის განხილვა. საჩივარი შემოსულია ამ ორი უბნის გადათვლაზე. #21 უბანზე მხოლოდ და მხოლოდ ბათილ ბიულეტენებზე საუბარი. #18 უბანზე მთელი უბნის გადათვლა არის მოთხოვნილი, ვინაიდან, გაცემულ ბიულეტენებზე ერთი ხელმოწერა ნაკლებია", - განაცხადა მცხეთის საოლქო კომისიის თავმჯდომარე რობერტ აზარაშვილმა.

საჩივრების განხილვის პროცესს ეუთო/ოდირის წარმომადგენლები ესწრებიან. ადგილზე იმყოფებიან ოპოზიციის წევრებიც.