ბათუმში, კორპუსის ჩამონგრევის ადგილზე „ნაციონალური მოძრაობის“ მერობის კანდიდატი გიორგი კირთაძე მივიდა
ბათუმში, 26 მაისის ქუჩაზე, სადაც საცხოვრებელი კორპუსის ერთი სადარბაზო მთლიანად ჩამოინგრა, ბათუმში „ერთიანი ნაციონალური მოძრაობის“ მერობის კანდიდატი გიორგი კირთაძე იმყოფება.
კირთაძის თქმით, ახლა სამაშველო სამსახურების სწრაფი და ეფექტური მუშაობა ყველაზე მნიშვნელოვანია.
„ვერანაირ შეფასებას ვერ გავაკეთებ. ახლა ძალიან მნიშვნელოვანია სამაშველო სამსახურებმა იმუშაონ, რაც შეიძლება სწრაფად და ეფექტურად. ნახევარი კორპუსია ლამის დანგრეული და რა თქმა უნდა, ხალხი იქნება ალბათ მოყოლილი. ახლა მნიშვნელოვანია სამაშველო სამსახურების კარგი მუშაობა“, - განაცხადა კირთაძემ.
ცნობისთვის, ბათუმში, 26 მაისის ქუჩაზე საცხოვრებელი კორპუსის ერთი სადარბაზო მთლიანად ჩამოინგრა. ადგილზე მობილიზებულია სამაშველო და სასწრაფო დახმარების სამსახურები.
