ბათუმში, 26 მაისის ქუჩა, სადაც საცხოვრებელი კორპუსის ნაწილი ჩამოიშალა, გადაიკეტება

შინაგან საქმეთა მინისტრის, ვახტანგ გომელაურის ინფორმაციით, ბათუმში, 26 მაისის ქუჩა გადაიკეტება.
ამის შესახებ გომელაურმა ჟურნალისტებს განუცხადა.
როგორც შს მინისტრმა აღნიშნა, ადგილზე სიტუაციას სამართალდამცავები გააკონტროლებენ.
„დარჩებიან ადგილზე პოლიციელები. სავარაუდოდ, ეს ქუჩა დაიკეტება, რომ არ იმოძრაოს ხალხმა. უკანა ეზოშიც გაკეთდება ბარიერები, რომ არ შევიდეს ვინმე და ამან საფრთხე არ გამოიწვიოს. მშენებლები შეიკრიბებიან მერიაში, იმსჯელებენ მოხდეს თუ არა მთლიანად ფლიგელის დემონტაჟი, თუ მარტო ჩამოშლილი „ბეტონის“. შემდეგ უკვე გაკეთდება რესტავრაცია“, - განაცხადა გომელაურმა.
ცნობისთვის, ბათუმში, 26 მაისის ქუჩაზე საცხოვრებელი კორპუსის ერთი სადარბაზო გუშინ ჩამოინგრა. ნგრევას 9 ადამიანი ემსხვერპლა, აქედან 4 ერთი ოჯახის წევრია. რაც შეეხება 36 წლის მამაკაცს, რომელიც მაშველებმა კორპუსის ნანგრევებიდან გუშინ, რამდენიმე საათიანი სამძებრო სამუშაოების შემდეგ ამოიყვანეს, კლინიკაშია მოთავსებული და მისი მდგომარეობა მძიმეა.
შინაგან საქმეთა სამინისტრომ მომხდარ ფაქტზე 3 პირი დააკავა.
























