ბოლნისში ზრდასრულთა განათლების ცენტრი გაიხსნა

DVV International-ის დაფინანსებითა და ბოლნისის მუნიციპალიტეტის მერიის მხარდაჭერით, ბოლნისში ზრდასრულთა განათლების ცენტრი გაიხსნა.

ბოლნისის მუნიციპალიტეტის მერიის ინფორმაციით, ცენტრი ოფიციალურად გერმანიის ფედერაციული რესპუბლიკის ელჩმა საქართველოში ჰუბერტ ქნირშმა და DVV International-ის დირექტორის მოადგილემ უვე გარტენშლეგერმა გახსნეს.

„ცენტრის გახსნას DVV International-ის რეგიონული კოორდინატორი ბეტინა ბრანდტი, ბოლნისის, დმანისის, თეთრიწყაროსა და წალკის მაჟორიტარი დეპუტატი გოგი მეშველიანი და 2021 წლის ადგილობრივი თვითმმართველობის არჩევნების შედეგად, მეორე ვადით არჩეული ბოლნისის მუნიციპალიტეტის მერი დავით შერაზადიშვილი ესწრებოდნენ. სტუმრები ცენტრში არსებული კურსების სასწავლო პროცესს ადგილზე გაეცნენ და მსმენელებს გაესაუბრნენ.

ბოლნისის ზრდასრულთა განათლების ცენტრის კონცეფცია გერმანულ მოდელს ეყრდნობა და ის მსმენელებს 15 სხვადასხვა სასწავლო კურსს სთავაზობს. ცენტრი ასევე 2 კლუბს, ახალგაზრდულ მიმართულებასა და სწავლებისა და დასაქმების ხელშეწყობის ცენტრსაც აერთიანებს. ზრდასრულთა განათლების ცენტრმა მსმენელების მიღება რამდენიმე თვის წინ დაიწყო. მსგავსი ცენტრები წარმატებით ფუნქციონირებს გერმანიის ფედერაციულ რესპუბლიკაში, რომელთა მიზანიც არაფორმალური განათლების ხელშეწყობა და განვითარებაა.

აღსანიშნავია, რომ ცენტრის გახსნის ცერემონიალის ბოლოს, კომპიუტერული პროგრამების შემსწავლელი კურსის კურსდამთავრებულებს სერტიფიკატები გადაეცათ“, - აღნიშნულია გავრცელებულ ინფორმაციაში.

როგორც ბოლნისის მუნიციპალიტეტის მერმა დავით შერაზადიშვილმა აღნიშნა, ცენტრის კონცეფცია გერმანულ მოდელს ეყრდნობა, რაც ხარისხიან სასწავლო პროგრამებს განაპირობებს.

„ადგილობრივ თვითმმართველობასთან თანამშრომლობის შედეგად, ბოლნისში ზრდასრულთა განათლების ცენტრმა დაიწყო ფუნქციონირება. ცენტრი ახლა უკვე ოფიციალურად გაიხსნა. მინდა ამ პროექტის ინიციატორებსა და DVV International-ს დიდი მადლობა გადავუხადო. ზრდასრულთა განათლების ცენტრში ჩვენი მოქალაქეები სხვადასხვა პროფესიის დაუფლებას შეძლებენ, რაც ვფიქრობ, მუნიციპალიტეტში დასაქმების სფეროს კიდევ უფრო მეტად კონკურენტულს გახდის. ძალიან მნიშვნელოვანია ისიც, რომ ცენტრის კონცეფცია გერმანულ მოდელს ეყრდნობა, რაც ხარისხიან სასწავლო პროგრამებს განაპირობებს. ზრდასრულთა განათლების ცენტრს წარმატებებს ვუსურვებ, ბოლნისის მუნიციპალიტეტი ცენტრის საქმიანობას ყოველთვის აქტიურად დაუჭერს მხარს“, - განაცხადა დავით შერაზადიშვილმა.

ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს