მთავარი და პრიორიტეტული არის მიხეილ სააკაშვილის გათავისუფლება. ის არის პოლიტიკური პატიმარი, ის არის უსამართლოდ დაკავებული და სამწუხაროდ, ეს ხელისუფლება ნაცვლად იმისა, რომ ფიქრობდეს ქვეყანაზე, ფიქრობს საკუთარ პირად ინტერესებზე, ავადმყოფურ პოლიტიკურ ამბიციებზე, - ამის შესახებ "ნაციონალური მოძრაობის" ერთ-ერთმა ლიდერმა აკაკი მინაშვილმა რუსთავის მე-12 პენიტენციურ დაწესებულებასთან ყოფილი პრეზიდენტის მონახულებამდე განაცხადა.
მისი თქმით, მიხეილ სააკაშვილი არის ადამიანი, რომელმაც თავისი თავისუფლება, ქვეყნის თავისუფლებას შესწირა.
"თქვენ ხედავთ საერთაშორისო გამოხმაურებას მიხეილ სააკაშვილის დაპატიმრების საკითხზე. პოზიცია არის ერთსულოვანი, ყველა ჩვენს მეგობარში, დასავლური სამყაროს წარმომადგენელში რომ ეს არის პოლიტიკური დევნა და ეს უნდა შეწყდეს. საქართველოს ამ ხელისუფლების პირობებში არ აქვს პერსპექტივა ევროპული განვითარების, დასავლური განვითარების და აუცილებელია ცვლილება, რომ ქვეყანას გაუჩნდეს შანსი ევროპულ ოჯახში გაწევრიანების. მიხეილ სააკაშვილი არის ადამიანი, რომელმაც თავის თავისუფლება შესწირა, ქვეყნის თავისუფლებას. მიხეილ სააკაშვილი უნდა გათავისუფლდეს ძალიან სწრაფად და ეს მნიშვნელოვანია ყველასთვის. მთავარი და პრიორიტეტული არის მიხეილ სააკაშვილის გათავისუფლება. ის არის პოლიტიკური პატიმარი, ის არის უსამართლოდ დაკავებული და სამწუხაროდ, ეს ხელისუფლება ნაცვლად იმისა, რომ ფიქრობდეს ქვეყანაზე, ფიქრობს საკუთარ პირად ინტერესებზე, ავადმყოფურ პოლიტიკურ ამბიციებზე", - განაცხადა აკაკი მინაშვილმა.
ამასთან, მანვე აღნიშნა, რომ ხვალინდელი აქციის მთავარი გზავნილი მიხეილ სააკაშვილის გათავისუფლება იქნება.
„ძალიან ბევრი ადამიანი შეიკრიბება დამიჯერეთ. ქვეყანაში აუცილებელია ძალიან სწრაფი ცვლილებები. ეს აქცია ემსახურება მიხეილ სააკაშვილის გათავისუფლებას, ქვეყნის გათავისუფლებას და ეს აქცია ემსახურება, რომ ქვეყანაში ჩატარდეს ვადამდელი არჩევნები", - აღნიშნა მინაშვილმა.
