პარლამენტის თავმჯდომარის, კახა კუჭავას განცხადებით, შესაბამისმა უწყებებმა არამხოლოდ მესამე პრეზიდენტის, არამედ თითოეული პატიმრის ჯანმრთელობის მდგომარეობაზე უნდა იზრუნონ.

როგორც კუჭავა აღნიშნავს, მაღალი საზოგადოებრივი ინტერესიდან გამომდინარე, სახალხო დამცველს, დეპუტატებს შეუძლიათ საქმეში ჩართვა და საზოგადოებისთვის ინფორმაციის მიწოდება.

„აუცილებელია არამხოლოდ მესამე პრეზიდენტის, თითოეული პატიმრის ჯანმრთელობაზე შესაბამისმა უწყებამ იზრუნოს, პენიტენციური იქნება ეს თუ ჯანდაცვის სამინისტრო. თუ უფრო მაღალი საზოგადოებრივი ინტერესის მატარებელია ამა თუ იმ პატიმრის ჯანმრთელობა, ჩაერთოს ყველა ის ბერკეტი, დაინტერესებული მხარე, ვისაც ამის სურვილი აქვს, იქნება ეს სახალხო დამცველი, თუ დეპუტატები, მათ შეუძლიათ და ვიცი, რომ ეს ფორმატი შეიქმნა კიდეც და მიაწოდონ მოსახლეობას ინფორმაცია ჯანმრთელობასთან დაკავშირებით“, - განაცხადა კუჭავამ.