ბათუმში, 26 მაისის ქუჩაზე კორპუსის ჩამონგრევის შედეგად დაზარალებულ მოსახლეობას დემონტაჟის შემდეგ იმავე ადგილზე ახალი კორპუსი აუშენდება.
როგორც ბათუმის მერის მოვალეობის შემსრულებელმა ლელა სურმანიძემ განაცხადა, მოსახლეობასთან ინდივიდუალური კომუნიკაცია და შეთანხმება იქნება.
„26 მაისის ქუჩის 13 ნომერთან დაკავშირებით მოვიდა ექსპერტიზის დასკვნა და შენობის დემონტაჟი არის მოთხოვნილი. დღეს საკრებულოს რიგგარეშე სხდომა ჩატარდა, რომელზეც გამოეყო თანხა პროექტის შესაძენად და დემონტაჟის განსახორციელებლად. დღეს ამ კორპუსის მცხოვრებლებთან შეხვედრა იყო, სადაც შეთავაზება მოხდა. დროებით ბინების დაქირავების ხარჯებს მერია გადაიხდის, სანამ ამ კორპუსთან დაკავშირებით პროცესები არ დასრულდება.
გადაწყვეტილება არის მიღებული შემდეგი: დემონტაჟის შემდეგ აშენდება იგივე სართულის კორპუსი, ყველას გადაეცემა ბინები. მერიას აქვს გამოცდილება ამ ტიპის სამუშაოების ჩატარების. იმ შემთხვევაში თუ ადამიანს არ უნდა ქირით ცხოვრება, მერიის საბინაო ფონდიდან დროებით ბინა გადაეცემა, სანამ ახალი კორპუსი აშენდება, ასევე სხვა ვარიანტებიც განიხილება. თუ პირს აღარ უნდა იმ კორპუსში ცხოვრება, ინდივიდუალურად სურვილების გათვალისწინებით გაიცემა კომპენსაციები. რაც შეეხება დაზიანებულ მანქანებს, ამასთან დაკავშირებით, უნდა მოგვმართონ მერიაში“, - აცხადებს ლელა სურმანიძე.