თელავში მცხოვრებ დევნილ ოჯახებთან შეხვედრა გაიმართა

საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე გიორგი წოწკოლაური, დევნილთა, ეკომიგრანტთა და საარსებო წყაროებით უზრუნველყოფის სააგენტოს დირექტორი ბესარიონ სიმონიშვილი და კახეთის სახელმწიფო რწმუნებული ირაკლი შიოშვილი თელავში მცხოვრებ დევნილ ოჯახებს შეხვდნენ.

დევნილთა სააგენტოს ინფორმაციით, შეხვედრაზე სააგენტოს დირექტორმა იძულებით გადაადგილებული ოჯახების პრობლემები მოისმინა და მათ საჭიროებებს ადგილზე გაეცნო.

ბესარიონ სიმონიშვილის განცხადებით, სააგენტო ადგილობრივი მუნიციპალიტეტის მხარდაჭერითა და ჩართულობით ყველაფერს აკეთებს, იძულებით გადაადგილებული ოჯახების საცხოვრებელი პირობების გასაუმჯობესებლად.