აჭარის მაღალმთიან სოფლებში უხვი ნალექის გამო მეწყრული პროცესები განვითარდა. ადგილობრივების ინფორმაციით, ჩამოწოლილმა მიწის მასამ საავტომობილო გზებზე პრობლემები შექმნა.

როგორც "ინტერპრესნიუსს" აჭარის საავტომობილო გზების დეპარტამენტში განუცხადეს, უწყება ადგილობრივი მნიშვნელობის გზებზე გაწმენდით სამუშაოებს ინტენსიურად ახორციელებს.

"აჭარაში დამეწყრილი გზების გაწმენდა ინტენსიურად მიმდინარეობს. ხულოს, შუახევის, ქედისა და ქობულეთის მუნიციპალიტეტებში, რამდენიმე მიმართულებით ინტენსიურად იწმინდება დამეწყრილი ადგილობრივი მნიშვნელობის საავტომობილო გზები.

ხულოში 3 მიმართულებით იწმინდება საავტომობილო გზები, შუახევში 7 მიმართულებით, ქედაში 8 მიმართულებით, ქობულეთში 2 მიმართულებით.

არცერთ ადგილობრივი მნიშვნელობის საავტომობილო გზაზე მიმოსვლა შეზღუდული არ არის",- აცხადებენ უწყებაში.