თბილისის საქალაქო სასამართლოში "თბილისი პრაიდის" საწინააღმდეგო აქციაზე მედიასაშუალებების წარმომადგენლების მიმართ განხორციელებული ფიზიკური ძალადობისა და პროფესიულ საქმიანობაში უკანონოდ ხელის შეშლის ფაქტზე დაკავებული 7 პირის სასამართლო პროცესი მიმდინარეობს.

აღნიშნულ პირებს ტელეკომპანიების: "იმედის", "რუსთავი2-ის, "ფორმულას", „მთავარი არხის“, გამოცემების - "ტაბულასა" და "რადიო თავისუფლების" წარმომადგენლებზე ძალადობას ედავებიან.

დღევანდელ სასამართლო პროცესზე მტკიცებულებების დასაშვებობაზე იმსჯელებენ. ასევე, დღეს გადაწყდება, გადაეცემა თუ არა აღნიშნული საქმე სასამართლოს არსებითად განსახილველად.

ცნობისთვის, რუსთაველის გამზირზე, მედიასაშუალებების წარმომადგენელთა მიმართ განხორციელებული ძალადობრივი ქმედებებზე და პროფესიულ საქმიანობაში ხელის შეშლის ფაქტებზე გამოძიება სისხლის სამართლის კოდექსის 154-ე (ჟურნალისტისთვის პროფესიულ საქმიანობაში უკანონოდ ხელის შეშლა) და 126-ე (ძალადობა) მუხლებით მიმდინარეობს.

ეპიზოდზე, რომელშიც 27 ბრალდებულია, 53 დაზარალებულია. საერთო ჯამში საქმეს 31 ბრალდებული და 57 დაზარალებული ჰყავს.