„ნაციონალური მოძრაობის” წევრის ანა წითლიძის განცხადებით, მათ ინფორმაცია აქვთ, რომ "ქართული ოცნება” ზუგდიდის საარჩევნო უბნებზე ე.წ. კარუსელის დატრიალებას აპირებს.

მისი თქმით, მე-18 და 21-ე უბნებზე შესაძლოა, მობილიზდნენ პირები, რომლებიც შეეცდებიან ე.წ. კარუსელის დატრიალებას ხმების გაყალბებისთვის.

როგორც წითლიძემ აღნიშნა, დილიდან, ქალაქის ყველა უბანზე “ნაციონალური მოძრაობის” დამკვირვებლებსა და წარმომადგენლებს შეეზღუდათ სამაგიდო სიების კონტროლი.

„იმის გამო, რომ ჩვენი დამკვირვებლები ამაზე საჩივრებს წერდნენ, ისინი უბნებიდან გამოაძევეს, მაგალითად, მე-10 და მე-3 უბნებიდან. ახლა, ყველა ჩვენი წარმომადგენელი და დამკვირვებელი გამოძევების ზღვარზეა, იმიტომ, რომ ეს ადამიანები იბრძვიან, რათა აღკვეთონ ყველა დარღვევა. ასევე, ქალაქის არცერთ უბანზე დაცული არ არის 100 - მეტრიანი დისტანცია და მიუხედავად არაერთი მიმართვისა, პოლიცია არაფერს აკეთებს. ნარკოტიკული ნივთიერების თრობის ქვეშ ადამიანები, ე.წ. ძველი ბიჭები იმყოფებიან საარჩევნო უბნებზე, რომლებიც ცდილობენ ზემოქმედების მოხდენას ამომრჩეველზე. მივმართავ პოლიციას, უზრუნველყოს ქალაქის ყველა უბანზე 100 - მეტრიანი დისტანციის დაცვა, რომ არაუფლებამოსილი ადამიანები არ იყვნენ უბნების შიგნით. ფიზიკური დაპირისპირებაც მოხდა მე-20 და 81-ე უბნებზე. მე-20 უბანზე შემთხვევა გვქონდა ასეთი, ამომრჩეველმა ქუჩაში ნაპოვნი ბიულეტენები შემოიტანა და თქვა, რომ ეს ბიულეტენები იპოვა", - განაცხადა ანა წითლიძემ.