ქუთაისის მერი იოსებ ხახალეიშვილი გუგუნავას ქუჩაზე სოციალური საცხოვრისის რეაბილიტაციის პროცესს, საკრებულოს ჯანდაცვისა და სოციალურ საკითხთა კომისიის თავმჯდომარე მამუკა რიჟამაძესთან ერთად გაეცნო.
ქუთაისის მუნიციპალიტეტის მერიის ინფორმაციით, შენობაში მოეწყობა ინდივიდუალური საცხოვრებელი ფართები, შესაბამისი ინფრასტრუქტურით.
განახლდება შენობის ფასადი და გადახურვა. 821 000 ლარის ღირებულების სამუშაოებს ტენდერში გამარჯვებული შპს ,,ტუკა" ასრულებს.
"ჩვენი საცხოვრებლის გარეშე მყოფი თანაქალაქელებისთვის საბინაო ფართების გამოყოფა დღემდე მწვავე პრობლემად რჩება. ამ საკითხს მნიშვნელოვნად მოაგვარებს გუგუნავას ქუჩაზე ახალი სოციალური საცხოვრისი. შენობა თანამედროვე სტანდარტების შესაბამისად მოეწყობა და საიმედო თავშესაფარი იქნება იმ ადამიანებისთვის, ვინც იქ იცხოვრებს", - განაცხადა იოსებ ხახალეიშვილმა.
ქუთაისის მუნიციპალიტეტის მერიის ცნობით, სოციალური საცხოვრისის მშენებლობა - რეაბილიტაცია მარტში დასრულდება.