თემურ ჯანაშია - მიხეილ სააკაშვილის მდგომარეობა უფრო და უფრო მძიმდება

დინამიკის მიხედვით თუ ვიმსჯელებთ, მიხეილ სააკაშვილის მდგომარეობა უფრო და უფრო მძიმდება. როდესაც ის ბოლოს

ვნახე, მან მითხრა, რომ წნევის თამაშს, გულის რითმის დარღვევას და თავის ტკივილებს უჩიოდა , - ამის შესახებ „ნაციონალური მოძრაობის“ წევრმა თემურ ჯანაშიამ რუსთავის ციხესთან განაცხადა.

მისი თქმით, რაც უფრო მეტი დრო გავა, ეს სიმპტომები უფრო მოიმატებს.

"ამაზე ექიმებმა უნდა იმსჯელონ. არანორმალურია ადამიანი ამ ხნის განმავლობაში შიმშილობდეს და არ იღებდეს სრულფასოვან სამედიცინო დახმარებას.

ყველა აქ შეკრებილი ადამიანის მოთხოვნაა, რომ სააკაშვილი გადაიყვანონ ნორმალურ სამედიცინო დაწესებულებაში, სადაც ის კვალიფიციურ დახმარებას მიიღებს", - განაცხადა ჯანაშიამ.

მან ასევე კომენტარი გააკეთა პენიტენციური სამსახურის მიერ გუშინ გავრცელებულ კადრებთან დაკავშირებითაც.

"მათი მოქმედება არის ამაზრზენი და რას ემსახურებოდა, ვერ გეტყვით. მათ კიდევ ერთხელ აჩვენეს, რომ აბსოლუტურად უზნეო ხელისუფლება გვყავს. კვებაზე საუბარს რომ თავი დავანებოთ, ვიკითხოთ, რატომ ზის ეს ადამიანი ციხეში, რატომ არ ეძლევა მას საჯარო გამოსვლის უფლება, რატომ არ აძლევენ სატელეფონო ზარის და ნორმალურ, სამართლიან სასამართლოს წინაშე წარდგომის უფლებას?", - აღნიშნა ჯანაშიამ.

ჯანაშია ასევე მიიჩნევს, რომ სააკაშვილი ე.წ. გლდანის ციხის საავადმყოფოში ვერ მიიღებს სრულფასოვან სამედიცინო დახმარებას. როგორც ჯანაშიამ აღნიშნა, ამას პირადი უსაფრთხოების სხვადასხვა პრობლემები ემატება, რაც მნიშვნელოვნად შეარყევს ყოფილი პრეზიდენტის ფსიქოლოგიურ და ემოციურ მდგომარეობას.