პარტია „დროა" იუსტიციის მინისტრის გადადგომას ითხოვს. როგორც პარტიის წევრმა, გიგა ლემონჯავამ პარლამენტთან გამართულ ბრიფინგზე განაცხადა, ამ მოთხოვნის დაყენების საკითხთან დაკავშირებით ისინი ოპოზიციურ პარტიებთან კონსულტაციებს გაივლიან.

„კადრები, რომელიც იუსტიციის სამინისტრომ გაასაჯაროვა, შეიცავს ადამიანის უფლებების დარღვევის უმძიმეს ფაქტებს. აქ საქმე გვაქვს სისხლის სამართლის უმძიმეს დანაშაულებთან. ერთი მხრივ ეს არის პერსონალური ინფორმაციის უკანონო გასაჯაროება, მეორე მხრივ, საქმე გვაქვს წამებასთან, არაადამიანურ და ღირსების შემლახავ მოპყრობასთან საქართველოს მესამე პრეზიდენტის მიმართ. ამდენად, აუცილებლად მიგვაჩნია, დატოვოს თანამდებობა იუსტიციის მინისტრმა, რომელიც ბოლო დღეების განმავლობაში სისტემატურად ჩადის დანაშაულს, არღვევს საქართველოს კანონმდებლობას და საერთაშორისო სტანდარტებს. გარდა სამართლებრივი ნაწილისა, ეს არის ერთ- ერთი ყველაზე ამორალური ქმედება, რომელიც ქართულ პოლიტიკურ სივრცეში მომხდარა ბოლო პერიოდის განმავლობაში,"- განაცხადა გიგა ლემონჯავამ.