ყაზბეგში დიდი ოდენობით არადეკლარირებული საქონელი აღმოაჩინეს. ფინანსთა სამინისტროს შემოსავლების სამსახურის ცნობით, განსაკუთრებით დიდი ოდენობით არადეკლარირებული საქონლის საერთო საბაჟო ღირებულებამ 22 551 ლარი შეადგინა.

„საბაჟო გამშვებ პუნქტში „ყაზბეგი“, ფინანსთა სამინისტროს შემოსავლების სამსახურის მებაჟე ოფიცრების მიერ, ეჭვის საფუძველზე, რუსეთის ფედერაციის მხრიდან შემოსული ავტომობილის (რომელსაც რუსეთის მოქალაქე მ.მ. მართავდა) დეტალური დათვალიერების შედეგად, 495 ცალი მაჯის საათი და 20 ერთეული ტყავის სამაჯური აღმოაჩინეს. საქმის მასალები შემდგომი რეაგირების მიზნით, ფინანსთა სამინისტროს საგამოძიებო სამსახურს გადაეცა“, - აღნიშნულია ინფორმაციაში.