ზოგად საფრთხეებზე მითითება გაუგებარია - სახელმწიფომ უნდა უზრუნველყოს, რომ ბრალდებული საკუთარ სასამართლო პროცესს დაესწროს, - ასე აფასებს “ახალგაზრდა იურისტთა ასოციაციის“ თავმჯდომარე ნიკა სიმონიშვილი ხელისუფლების არგუმენტებს, რის საფუძველზეც მიხეილ სააკაშვილის სასამართლო პროცესზე გადაყვანა არ ხდება.
სიმონიშვილის თქმით, თუ რაიმე საფრთხე არსებობს, ნაბიჯები ამ საფრთხეების ნეიტრალიზებასთან დაკავშირებით უნდა გადაიდგას, მაგრამ არა ის, რომ ბრალდებულს პროცესზე მისვლის შესაძლებლობა შეეზღუდოს.
“დაუსაბუთებლად მიგვაჩნია სახელმწიფოს მხრიდან იმ არგუმენტებზე მითითება, რაზეც უთითებენ, როცა ამბობენ, რომ მიხეილ სააკაშვილი სასამართლო პროცესს არ უნდა ესწრებოდეს. გაუგებარია, ამ განცხადების პენიტენციური სამსახურის მხრიდან გაკეთება, მაშინ როდესაც პროცესის მონაწილე საერთოდ არ არის და მხოლოდ აღმასრულებელია“, - განაცხადა სიმონიშვილმა.