ლენტეხის მუნიციპალიტეტის მერი ჩიხარეშის თემის მოსახლეობას შეხვდა და მათ საჭიროებებს ადგილზე გაეცნო
ლენტეხის მუნიციპალიტეტის მერი გია ონიანი ჩიხარეშის თემის მოსახლეობას შეხვდა და მათ საჭიროებებს ადგილზე გაეცნო.
როგორც „ინტერპრესნიუსს“ ლენტეხის მერიიდან აცნობეს, ნაცულის, მელეს, ჩიხარეშის, მარგვიშის, შკედისა და ახალშენის მოსახლეობამ, მერს ძირითად პრობლემად სასმელი წყლის, შიდა სასოფლო გზების, სანიაღვრე არხების რეაბილიტაცია და გარე განათების მოწყობა დაუსახელეს.
მათივე ინფორმაციით, გია ონიანმა ადგილობრივებს პირობა მისცა, რომ ყველა ინფრასტრუქტურული პროექტი მომავალში დაიგეგმება მოსახლეობის უშუალო ჩართულობით და დახარისხდება პრიორიტეტების მიხედვით.
„მე მზად ვარ ჩემ თანამშრომლებთან ერთად მივიდე თითოეულ სოფელში, უშუალოდ შევხვდე მოსახლეობას, მოვისმინო მათგან ის პრობლემები, რაც მათ აწუხებთ და ერთად დავსახოთ მათი გადაჭრის გზები“, - აღნიშნა გია ონიანმა.
ადგილობრივებს მერმა ასევე მოუწოდა მეტად იაქტიურონ, ჩაერთონ მუნიციპალიტეტის საქმიანობაში, რათა ერთიანი ძალისხმევით მოგვარდეს ის მნიშვნელოვანი და პრობლემური საკითხები, რაც ჩვენი რაიონის კეთილდღეობას და განვითარებას შეუწყობს ხელს.
v-if="article.gallery" v-html="article.gallery"
