გორის მუნიციპალიტეტის სკოლებში, ამ დროისთვის, 68 პედაგოგი და 220 მოსწავლეა ინფიცირებული, - ამის შესახებ გორის საგანმანათლებლო რესურსცენტრის ხელმძღვანელმა ნანა ტერმაკოზაშვილმა განაცხადა.
დღევანდელი მონაცემებით, სრულად დისტანციურ სწავლებაზეა ორი სკოლა და 36 ცალკეული კლასი.
„კორონავირუსული ინფექციის გამოვლენის გამო, ეპიდემიოლოგების რეკომენდაციის საფუძველზე, სრულად დისტანციურ რეჟიმში გრძელდება სწავლა გორის მუნიციპალიტეტის მასშტაბით არსებულ ორ ზოგადსაგანმანათლებლო დაწესებულებაში - ოთარშენის და გორის მეორე საჯარო სკოლებში. რაც შეეხება ცალკეულ კლასებს, გეტყვით, რომ ამ დროისთვის, 17 სკოლის 36 ცალკეული კლასი განაგრძობს დისტანციურ ფორმატში სწავლას.
28 ნოემბრის მონაცემებით, ინფიცირებულია გორის მუნიციპალიტეტის საჯარო სკოლების 68 პედაგოგი და 220 მოსწავლე. კიდევ ერთხელ მოვუწოდებ მშობლებს, ვირუსისთვის დამახასიათებელი სიმპტომების გამოვლენის შემთხვევაში, არ გაუშვან ბავშვი სკოლაში, გავუფრთხილდეთ საკუთარ და სხვის ჯანმრთელობას“, - განაცხადა ნანა ტერმაკოზაშვილმა.