ქვემო ქართლს ახალი სახელმწიფო რწმუნებული ჰყავს

ქვემო ქართლის რეგიონში ახალი გუბერნატორი დაინიშნა. ქვემო ქართლის გუბერნატორის პოსტი, შოთა რეხვიაშვილის ნაცვლად, გიორგი დოხტურიშვილმა დაიკავა, რომელიც 2021 წლის აგვისტოდან მისი მოადგილე იყო.

გიორგი დოხტურიშვილი, ქვემო ქართლის სამხარეო ადმინისტრაციაში ცოტა ხნის წინ, საქართველოს მთავრობის რეგიონებთან ურთიერთობის დეპარტამენტის უფროსმა ლერი ბარნაბიშვილმა მუნიციპალიტეტების მერებსა და სამხარეო ადმინისტრაციის თანამშრომლებს წარუდგინა.

როგორც ბარნაბიშვილმა განაცხადა, გიორგი დოხტურიშვილს სახელმწიფო სტრუქტურებში მუშაობის დიდი გამოცდილება აქვს, რაც შეეხება შოთა რეხვიაშვილს, ის რჩება გუნდში და უახლოეს დღეებში დაიკავებს სხვა საპასუხისმგებლო თანამდებობას.

„გიორგი დოხტურიშვილი არ არის ახალი სახე ქვემო ქართლის რეგიონისთვის, იგი 2021 წლის აგვისტოდან მუშაობს გუბერნატორის მოადგილედ, აქვს საკმაოდ დიდი გამოცდილება სახელმწიფო სტრუქტურებში მუშაობის. ათ წელზე მეტი მუშაობდა როგორც საკრებულოს, ასევე მერიის სტრუქტურებში სხვადასხვა მენჯერულ თანამდებობებზე და საკმაოდ დიდი გამოცდილება აქვს იმისთვის, რომ თავი გაართვას იმ გამოწვევებს, რომლებიც დგას ქვემო ქართლის რეგიონში“, - განაცხადა ლერი ბარნაბიშვილმა.

მან შოთა რეხვიაშვილს გუბერნატორის პოსტზე სამწლიანი მუშაობისთვის მადლობა გადაუხადა და აღნიშნა, რომ ის რჩება გუნდში, უახლოეს დღეებში გახდება ცნობილი თუ რა თანამდებობას დაიკავებს დღევანდელი მთავრობის შემადგენლობაში.

„შოთა რეხვიაშვილის უშუალო მონაწილეობით არაერთი პროექტი განხორციელდა და მოსახლეობის არაერთი პრობლემა გადაწყდა. ის არის ჩვენი გუნდის ერთგული წევრი და გააგრძელებს საქმიანობას შესაბამის საპასუხისმგებლო თანამდებობაზე ჩვენი მთავრობის შემადგენლობაში. კონკრეტულად სად, ამას უახლოეს დღეებში გაიგებთ“, - განაცხადა ბარნაბიშვილმა.

თავის მხრივ, შოთა რეხვიაშვილმა მადლობა გადაუხადა ცენტრალურ ხელისუფლებას და რეგიონის მუნიციპალიტეტების ხელმძღვანელ პირებს სამწლიანი ნაყოფიერი თანამშრომლობისთვის.

„განსაკუთრებული მადლობა ცენტრალური ხელისუფლების წარმომადგენლებს - სამთავრობო გუნდს, საერთაშორისო პარტნიორებს, სამოქალაქო და კერძო სექტორს, რომელთა უდიდესი მხარდაჭერის საფუძველზე, მხარეში მოსახლეობის საკეთილდღეოდ არაერთი მასშტაბური პროექტი განხორციელდა. მჯერა, რომ რეგიონის განვითარება ჩვენი გუნდის ახალი წევრების საქმიანობის პერიოდში, კვლავ, აქტიურად გაგრძელდება“, - განაცხადა შოთა რეხვიაშვილმა.

ახალი გუბერნატორის გიორგი დოხტურიშვილის განცხადებით, ქვემო ქართლი მისი მშობლიური რეგიონია და იცის ყველა იმ გამოწვევის შესახებ რაც ადგილზეა.

,,მადლობა მინდა გადავუხადო საქართველოს პრემიერ-მინისტრ ირაკლი ღარიბაშვილს და საქართველოს მთავრობას გამოცხადებული ნდობისთვის, დაკისრებული მაღალი პასუხისმგებლობისთვის. ჩვენ გვაქვს სამოქმედოდ გეგმა, რომელიც დააინიცირა პრემიერმა და წარმოადგინა საქართველოს მთავრობამ. რა თქმა უნდა, აღმასრულებელ ხელისუფლებასთან ერთად განვითარების ამ გეგმას მივყვებით, ძალიან ბევრი რეფორმა იქნება გასატარებელი, მათ შორის საკანონმდებლო, რომელიც რეგიონს სჭირდება“, - განაცხადა გიორგი დოხტურიშვილმა.

ანდრო გოცირიძე - პოლიტიკური სარგებლის მიღების მიზნით, მმართველი პარტია არ ერიდება მოსახლეობის დაპირისპირებას, პოლარიზაციის გაღვივებას და აღვირახსნილ ანტიდასავლურ კამპანიასაც კი
მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს