„თავისუფლება მიშას“ - ამ ლოზუნგით, ქობულეთის პოლიციის შენობასთან „ერთიანი ნაციონალური მოძრაობის" ქობულეთის ორგანიზაციის წევრებმა საპროტესტო აქცია -პერფორმანსი გამართეს.
აქციის მონაწილეებმა პოლიციის შენობასთან საქართველის ყოფილი პრეზიდენტის მიხეილ სააკაშვილის ფოტოები და ბანერი გამოფინეს.
მათი განცხადებით, საქართველოს მესამე პრეზიდენტის პოლიტიკური დევნა უნდა შეწყდეს, ამასთან, აქციის მონაწილეებმა გარდაცვლილ ნუგზარ ფუტკარაძის საქმის დროული გამოძიება მოითხოვეს. წინააღმდეგ შემთხვევაში "ერთიანი ნაციონალური მოძრაობის" წევრები აქციებს აანონსებენ.
"თქვენ იცით, ქვეყანაში პოლიტიკური მართლმსაჯულება როგორ მიმდინარეობს. ეს ეხება ყველა ადამიანს, ვინც ხელისუფლების საწინააღმდეგოდ იღებს ხმას. მიხეილ სააკაშვილის მხარდამჭერები ნებისმიერი სიტყვის გაჟღერებისას დაპატიმრებულები ვართ. მიდის აშკარა პოლიტიკური დევნა. სამწუხაროდ, ქობულეთის პოლიცია ამ პოლიტიკურ დევნაში ჩაერთო და მოგეხსენებათ, რამდენიმე დღის წინ საკრებულოს წევრები დააკავეს და აჯარიმებენ მოქალაქეებს, რომლებსაც განსხვავებული აზრი აქვთ. ხელისუფლება ცდილობს პოლიციის ძალით ჩაახშოს განსხვავებული აზრი, რაც არ გამოუვათ",- აღნიშნა ბონდო თედორაძემ.