ბათუმის საკრებულოს სხდომა კვორუმის არარსებობის გამო ჩაიშალა. საკრებულოს სხდომაზე „ქართული ოცნების“ წარმომადგენლები და გახარიას პარტიიდან გასული დეპუტატი ირაკლი თავდგირიძე არ გამოცხადდნენ. როგორც მმართველი გუნდის წევრები ჟურნალისტებთან საუბრისას აცხადებენ, ისინი არ აპირებენ ქალაქის წინააღმდეგ ოპოზიციის მიერ დაგეგმილ პროვოკაციაში მონაწილეობის მიღებას. მათი თქმით, ბიუჯეტი დამტკიცებულია და იგი მორგებულია მოსახლეობის ინტერესებზე.

დღევანდელ სხდომაზე მხოლოდ ოპოზიციის წევრები გამოცხადდნენ. აღსანიშნავია, რომ საკრებულოს სხდომა სწორედ „ნაციონალური მოძრაობის“ ინიციატივით დაიგეგმა. ოპოზიციას ორი საკითხი ჰქონდა დღის წესრიგში დაყენებული - საკრებულოს თავმჯდომარის არჩევა და 2022 წლის ბათუმის ბიუჯეტის ბათილად ცნობა. ოპოზიციაში აცხადებენ, რომ საკრებულოს სხდომებს ინტენსიურად მოიწვევენ და აუცილებლად მოხდება უმრავლესობაში მყოფი ოპოზიციის მიერ საკრებულოს თავმჯდომარის არჩევა და ბიუჯეტის ბათილად ცნობა.