ადვოკატ ნიკა გვარამიას განცხადებით, გორის სამხედრო ჰოსპიტლის ექიმი ნინო გოგორიშვილი აცხადებს, რომ მესამე პრეზიდენტის მიხეილ სააკაშვილის რეაბილიტაცია საქართველოში შესაძლებელია მხოლოდ თავისუფლების პირობებში. ამის შესახებ გვარამიამ ჟურნალისტებს გორის სამხედრო კლინიკასთან განუცხადა, სადაც დღეს მიხეილ სააკაშვილი მოინახულა.

ნიკა გვარამიამ ჰოსპიტლიდან გამოსვლის შემდეგ ჟურნალისტებს გააცნო ექიმ ნინო გოგორიშვილის გამოკითხვის ოქმი, სადაც გვარამიას ინფორმაციით, მკურნალი ექიმი ამბობს, რომ თუ მიხეილ სააკაშვილის რეაბილიტაცია საქართველოში თავისუფლების პირობებში არ მოხდება, მაშინ რეკომენდირებულია სააკაშვილის საზღვარგარეთ გაყვანა.

გარდა ამისა, ნიკა გვარამიას ინფორმაციით, ექიმმა ნინო გოგორიშვილმა აღწერა ის პროცესიც, რაც გუშინ მიხეილ სააკაშვილის პალატაში განვითარდა.

“პირველი, შევიდა მკურნალი ექიმი გოგორიშვილი და პრეზიდენტს განუცხადა, რომ გაწერეს, შემდეგ შევიდა ორი შავფორმიანი და უარის მიუხედავად დაუწყეს იძულებით გაყვანა. იყო შეხლა-შემოხლა. კრიზისი ჰქონდა და დააბრუნეს საწოლში. წნევა - 180/110-ზე, პულსი-140. მიიღო ორი “კაპტოპრილი” და ერთი “ბეტალოკი ზოკი”. სახალხო დამცველის წარმომადგენლის გასვლისთანავე საათის მოხსნის მიზეზით შევიდა ბადრაგის რამდენიმე წარმომადგენელი, ლოგინში ეჯაჯგურა და იძულებით მოხსნა საათი. ექიმი ანესთეზიოლოგი, ნიკო გორსაგაშვილი იყო უშუალოდ შემსწრე“, - განაცხადა გვარამიამ და განმარტა, რომ ვითარების ამდაგვარ აღწერას გამოკითხვის ოქმში ექიმი ნინო გოგორიშვილი ეთანხმება.

გვარამიას თქმით, გორსაგაშვილი იყო ფაქტის უშუალო შემსწრე, რადგან სახალხო დამცველის წარმომადგენლის მერე ნინო გოგორიშვილი დაწესებულებიდან გამოსული იყო.