საფრანგეთში მოკლული ახალგაზრდა მამაკაცის ცხედრის საქართველოში ჩამოსვენებას ოჯახი უახლეს დღეებში ელოდება. როგორც მოკლული ახალგაზრდის მეზობლებმა ჟურნალისტებთან საუბარში აღნიშნეს, სამშობლოში გადმოსვენების საკითხს საგარეო საქმეთა სამინისტრო აგვარებს.
მათივე ინფორმაციით, ახალგაზრდა მამაკაცს გულის არეში დანით ჰქონდა მიყენებული ჭრილობა და ის საავადმყოფოში გარდაიცვალა. შემთხვევა საფრანგეთში, ქალაქ მარსელში მოხდა. შემთხვევის დროს მამაკაცი მეუღლესთან ერთად იმყოფებოდა.
„მეუღლე თან ახლდა და ის შოკში იყო. სხვა ინფორმაცია არ გვაქვს", - აცხადებენ მეზობლები.
25 წლის ალექსი გოგია ჩხოროწყუს სოფელ ნაფიჩხოვოში ცხოვრობდა. იგი მეუღლესთან ერთად საფრანგეთში სამი თვის წინ სამუშაოდ წავიდა.
არსებული ინფორმაციით, ერთ-ერთი პირი ალექსი გოგუას ცოლისთვის ტელეფონის წართმევას ცდილობდა, რასაც ურთიერთშელაპარაკება მოჰყვა, რა დროსაც იგი ცივი იარაღით დაჭრეს.