ადვოკატი - გამოვიყენებთ ყველა სამართლებრივ ბერკეტს იმისთვის, რომ ადგილობრივი და საერთაშორისო დონის სასამართლოების საშუალებით შევძლოთ სააკაშვილის უფლებების დაცვა და ეფექტური აღდგენა
გამოვიყენებთ ყველა სამართლებრივ ბერკეტს იმისთვის, რომ ადგილობრივი და საერთაშორისო დონის სასამართლოების საშუალებით შევძლოთ სააკაშვილის უფლებების დაცვა და ეფექტური აღდგენა, - ამის შესახებ მიხეილ სააკაშვილის ადვოკატმა შოთა თუთბერიძემ რუსთავის მეთორმეტე პენიტენციურ დაწესებულებაში მისვლის შემდეგ განაცხადა.
ადვოკატის ინფორმაციით, დღევანდელ შეხვედრაზე სააკაშვილთან ერთად განიხილავენ თავისუფლების აღკვეთის შემდეგ მის წინააღმდეგ განხორციელებულ კანონის სრულ უგულებელყოფას, კერძოდ, "ადვოკატებთან კომუნიკაციის გაურკვევლად შეზღუდვას, ბარიერების აღმართვას და ექიმების მიერ მისი მონახულების აკრძალვას, რაც ხელისუფლების მხრიდან პირდაპირი არაადამიანური მოპყრობაა".
„ჩვენთვის მნიშვნელოვანია პრეზიდენტის ჯანმრთელობის მდგომარეობა, გარდა ამისა, განვიხილავთ მომდევნო პროცესის მიმდინარეობას 24 იანვარს და ვისაუბრებთ დაცვის სტრატეგიაზე, რომელიც დაცვის მხარეს აქვს მისი უფლებების დასაცავად იმ საკითხებზე, რაც ეხება მისი თავისუფლების აღკვეთის შემდეგ განხორციელებულ კანონის სრულ უგულებელყოფას - ადვოკატებთან კომუნიკაციის გაურკვევლად შეზღუდვას, ბარიერების აღმართვას და ექიმების მიერ მისი მონახულების აკრძალვას ხელისუფლების მხრიდან, რაც არის პირდაპირი არაადამიანური მოპყრობა.
ჩვენ გამოვიყენებთ ყველა სამართლებრივ ბერკეტს, რომ ადგილობრივი და საერთაშორისო დონის სასამართლოების საშუალებით შევძლოთ სააკაშვილის უფლებების დაცვა და ეფექტური აღდგენა. ყველა უფლება, რომელიც მესამე პრეზიდენტს გააჩნია, უნდა იყოს რეალიზებული. ნებისმიერ კანონდარღვევას, რომელზეც საქართველოს სახელმწიფო არ მოახდენს რეაგირებას დაცვის მხარე წაიღებს ევროსასამართლოში”, - აღნიშნა შოთა თუთბერიძემ.
