აჭარაში, ნათლისღების დღესასწაული ქრისტიანმა მორწმუნეებმა ზღვაში შესვლის ტრადიციით აღნიშნეს.

მრევლი ზღვაში შესვლამდე ღვთისმშობლის საკათედრო ტაძარში იმყოფებოდა, სადაც პარალელურად სადღესასწაულო წირვა - ლოცვა მიმდინარეობს.

"დღევანდელი დღე ცოდვათა მიტევების დღეა. ყველას გილოცავთ ნათლისღების დღესასწაულს. ჩვენ ტრადიციულად ზღვაში შესვლით აღვნიშნავთ ამ დღეს",- ამბობენ მოქალაქეები, რომლებიც ბათუმის სანაპიროსთან იმყოფებიან.

როგორც ცნობილია, 19 იანვარს ნათლისღების დღესასწაულზე ზღვაში შესვლის ტრადიცია მეუფე დიმიტრის ინიციატივით, ბათუმში უკვე რამდენიმე წელია სრულდება.

ამასთან, სანაპიროზე უსაფრთხოების დაცვის მიზნით საგანგებო სიტუაციების მართვის სამსახურის თანამშრომლები იყვნენ მობილიზებული.