გორის მუნიციპალიტეტის სკოლებში დისტანციური სწავლების სურვილი 592 მოსწავლის მშობელმა გამოთქვა და დარეგისტრირდა შესაბამის პლატფორმაზე, - ამის შესახებ "ინტერპრესნიუსს“ გორის საგანმანათლებლო რესურსცენტრის უფროსმა განუცხადა.

ნანა ტერმაკოზაშვილის ინფორმაციით, კორონავირუსული ინფექციის დაფიქსირების გამო, დღეიდან 28 იანვრის ჩათვლით, სწავლების სრულად დისტანციური მოდელი ამოქმედდა სამ საჯარო სკოლაში.

„დღეიდან 28 იანვრის ჩათვლით, სწავლების სრულად დისტანციური მოდელი მოქმედებს სოფელ კარალეთის მეორე საჯარო სკოლაში. გეგმური ტესტირების შედეგად, აღნიშნული საჯარო სკოლის ხუთ პედაგოგს დაუდასტურდა კორონავირუსული ინფექცია, ამიტომ, ეპიდემიოლოგების რეკომენდაციის საფუძველზე, სკოლაში სასწავლო პროცესი დროებით შეწყდა. ასევე, სრულად დისტანციურ სწავლებაზე გადავიდა კარალეთის 1-ელი და გორის მე-10 საჯარო სკოლები.

აქვე გეტყვით, რომ აღნიშნულის გარდა, ამ დროისთვის, 5 სკოლის 13 კლასია დისტანციურ სწავლებაზე გადასული.

რაც შეეხება ცალკეულ კლასებს, რესურსცენტრის ქვემდებარე 67 საჯარო სკოლაში 592 მოსწავლის მშობელმა გამოთქვა დისტანციური სწავლების სურვილი და დარეგისტრირდა შესაბამის პლატფორმაზე - სსიპ განათლების მართვის საინფორმაციო სისტემის მიერ შექმნილ ვებგვერდზე, სადაც მშობლებს დისტანციური სწავლების მოთხოვნის ან გაუქმების შესაძლებლობა ყოველ ხუთშაბათს ეძლევათ“, - განაცხადა ნანა ტერმაკოზაშვილმა.