კახეთის რეგიონში ვაქცინაციის კამპანიისა და მასთან დაკავშირებული წამახალისებელი პროგრამების პოპულარიზაციის მიზნით მოსახლეობასთან შეხვედრები გრძელდება.
მუნიციპალიტეტის მერიის ინფორმაციით, თელავის მუნიციპალიტეტის მერმა ლევან ანდრიაშვილმა კახეთის სახელმწიფო რწმუნებულის მოადგილესთან ლევან ლილუაშვილთან და საზოგადოებრივი ჯანდაცვის წარმომადგენლებთან ერთად თელავის მუნიციპალიტეტის სოფელ სანიორეში ადგილობრივებთან საინფორმაციო ხასიათის შეხვედრა გამართა.
შეხვედრაზე ხელისუფლებისა და ჯანდაცვის სფეროს წარმომადგენლებმა ადგილობრივ მოსახლეობას ვაქცინაციის მნიშვნელობასა და მასთან დაკავშირებული წამახალისებელი პროგრამების შესახებ დეტალური ინფორმაცია მიაწოდეს.
"დღეს, ჯანდაცვის სფეროს წარმომადგენლებთან ერთად, სოფელ სანიორეში საინფორმაციო ხასიათის შეხვედრა გავმართეთ, სადაც მოსახლეობას ვაქცინაციის აუცილებლობაზე და საკოორდინაციო საბჭოს მიერ გაცემული რეკომენდაციების დაცვისკენ მოვუწოდეთ. ასევე, გავაცანით მთავრობის გადაწყვეტილება 200 - ლარიანი წახალისების პროგრამის შესახებ, რომელიც 2022 წლის თებერვალშიც გრძელდება და ამ პროგრამით სარგებლობა 50 წლის ზევით საქართველოს ყველა მოქალაქეს შეუძლია", - აღნიშნა ლევან ანდრიაშვილმა.
საკოორდინაციო საბჭოს გადაწყვეტილებით, 50 წელს გადაცილებული პირების აცრის წახალისებისთვის პროგრამა თებერვლის თვეშიც გაგრძელდება. ასევე, 50 წელს გადაცილებულ პირებს, „ბუსტერ" დოზის გაკეთების შემთხვევაში, წახალისების მიზნით 100 ლარი დაერიცხებათ.