„დეილი“ ბსუ-ს სტუდენტებს სწავლას დაუფინანსებს

სუპერმარკეტების ქსელი „დეილი“ ბათუმის შოთა რუსთაველის სახელმწიფო უნივერსიტეტის სტუდენტებს სწავლას დაუფინანსებს.
ბათუმის შოთა რუსთაველის სახელმწიფო უნივერსიტეტსა და სუპერმარკეტების ქსელ „დეილს’’ შორის თანამშრომლობის მემორანდუმი გაფორმდა.
როგორც ბათუმის სახელმწიფო უნივერსიტეტში განმარტავენ, შეთანხმების საფუძველზე, სტუდენტებს შესაძლებლობა ეძლევათ, დასაქმდნენ სუპერმარკეტში და მიიღონ დაფინანსება. მათი ცნობით, კომპანიაში დასაქმების 6-თვიანი პერიოდის გავლის შემდეგ შპს „დეილი“ წარმატებულ სტუდენტებს დაუფინანსებს სწავლის 25%-ს, ხოლო 1-წლიანი პერიოდის გავლის შემდეგ - 50%-ს. მემორანდუმი, ასევე, მიზნად ისახავს ახალგაზრდების სტაჟირებას, სასწავლო-საგანმანათლებლო პროექტების განხორციელებას. თანამშრომლობის ფარგლებში, ჩატარდება ერთობლივი ტრენინგები, ლექციები, კონფერენციები და დისკუსიები.

























