გორის მერია - მეჯვრისხევში ახალი საბავშვო ბაღი შენდება

გორის მერია - მეჯვრისხევში ახალი საბავშვო ბაღი შენდება

გორის მუნიციპალიტეტის სოფელ მეჯვრისხევში ახალი საბავშვო ბაღი შენდება. ამის შესახებ ინფორმაციას გორის მუნიციპალიტეტის მერია ავრცელებს.

მათივე ცნობით, სააღმზრდელო დაწესებულება 180 ბავშვს მოემსახურება.

ამასთან, ორსართულიან შენობაში მოეწყობა საძინებლები, გასახდელები, სამზარეულო, საკუჭნაო, ბუფეტი, დარბაზი, ლიფტი, სათამაშო, პროდუქტების შესანახი, ექიმის, ადმინისტრაციის, ჭურჭლის სარეცხი ოთახები. ასევე იგეგმება შენობის თბოიზოლაციაც, რაც შემდგომში ენერგეტიკული რესურსების მოხმარების შემცირებას და ბიუჯეტის დაზოგვას უზრუნველყოფს.

პროექტი ითვალისწინებს ასევე, საბავშვო ბაღის ეზოს კეთილმოწყობას. გათვალისწინებულია გასართობი ატრაქციონების, სათამაშო ქვიშის მოედნების, საქანელების, ეზოს სკამების, სასრიალოების, საჩრდილობელი ფანჩატურების, ნაგვის ურნებისა და სასმელი წყლის შადრევნების (ე.წ სოკოს) მოწყობა.

სამუშაოები, რომლებსაც მუნიციპალური განვითარების ფონდი ახორციელებს, მიმდინარე წლის ბოლოს დასრულდება.

ამ ეტაპზე, მეჯვრისხევში საბავშვო ბაღი ფუნქციონირებას ალტერნატიულ ფართში აგრძელებს.