თბილისის საქალაქო სასამართლოში მედიასაშუალებების წარმომადგენლების მიმართ ჟურნალისტური საქმიანობის გამო განხორციელებული დევნის და ძალადობის ფაქტებზე ბრალდებულების სასამართლო პროცესი მიმდინარეობს.

დღევანდელ სასამართლო პროცესზე კვლავ ბრალდების მხარის მტკიცებულებებს გამოიკვლევენ. კერძოდ, სასამართლოში ჩვენებას "ფორმულას" დაზარალებული ჟურნალისტი რატი წვერავა მისცემს.

როგორც პროცესი დაწყებამდე წვერავამ განაცხადა, მას შემდეგ, რაც მასზე ძალადობა განხორციელდა, 6 თვე გავიდა, თუმცა, საგამოძიებო უწყებას ამ დრომდე მხოლოდ ერთი პირი ჰყავს დაკავებული.

ცნობისთვის, რუსთაველის გამზირზე, მედიასაშუალებების წარმომადგენელთა მიმართ განხორციელებული ძალადობრივი ქმედებებზე და პროფესიულ საქმიანობაში ხელის შეშლის ფაქტებზე გამოძიება სისხლის სამართლის კოდექსის 154-ე (ჟურნალისტისთვის პროფესიულ საქმიანობაში უკანონოდ ხელის შეშლა) და 126-ე (ძალადობა) მუხლებით მიმდინარეობს. ეპიზოდზე, რომელშიც 27 ბრალდებულია, 53 დაზარალებულია. საერთო ჯამში საქმეს 31 ბრალდებული და 57 დაზარალებული ჰყავს.