სალომე ზურაბიშვილი - დღეს ტრაგიკული დღეა უკრაინისთვის - დღეს, როცა უკრაინა ცდილობს გაუმკლავდეს ამ უმძიმეს ვითარებას, საქართველო მის გვერდით დგას

დღევანდელი დღე ტრაგიკული დღეა უკრაინისთვის - დღეს, როცა ის ცდილობს გაუმკლავდეს ამ უმძიმეს ვითარებას, საქართველო მის გვერდით დგას, - ამის შესახებ საქართველოს პრეზიდენტმა სალომე ზურაბიშვილმა განაცხადა.

ამასთან, პრეზიდენტმა დღეს დაგეგმილი ეროვნული თანხმობის სესია გააუქმა.

„ეროვნული თანხმობის დღევანდელი სესია, რომელიც აქ უნდა ჩატარებულიყო, გავაუქმე, რამეთუ დღეს ეროვნული თანხმობის საკითხი არის უკრაინა და ჩვენი სოლიდარობა უკრაინის მიმართ. დღევანდელი დღე ტრაგიკული დღეა უკრაინისთვის. მიუხედავად იმისა, რომ ბოლომდე მშვიდობის შენარჩუნებისთვის ყველაფერი იღონეს, ვერ აიცილეს თავიდან რუსეთის სრულმასშტაბიანი აგრესია. დღეს, როცა იგი ცდილობს გაუმკლავდეს ამ უმძიმეს ვითარებას, საქართველო მის გვერდით დგას. ეს დღე ასევე ტრაგიკულია საქართველოსთვის და ყველა მშვიდობისმოყვარე დემოკრატიული ერებისთვის ევროპასა და მსოფლიოში, რამეთუ ომი ევროპის გულში გაჩაღდა ყოველგვარი დიალოგის მცდელობის მიუხედავად. როგორც საქართველოს პრეზიდენტი, პრეზიდენტი ქვეყნის, რომელმაც ასეთივე აგრესია განიცადა, მინდა გამოვუცხადო უკრაინის პრეზიდენტს, მთავრობასა და ხალხს ჩვენი სრული სოლიდარობა. მინდა პატივი მივაგო იმ უკრაინელ ჯარისკაცებსა და უკრაინელებს, რომლებიც თავიანთი ქვეყნის სუვერენობის დაცვას შეეწირნენ. მინდა შევუერთდე გაეროს გენერალური მდივნის და ყველა სხვა ლიდერების დაუყოვნებლივ ცეცხლის შეწყვეტისკენ მოწოდებას“, - განაცხადა სალომე ზურაბიშვილმა.

ლევან  შენგელია - ხელისუფლების თამაში ევროსტრუქტურებთან უაღრესად საშიში თამაშია და შეიძლება საქართველოსთვის საბედისწეროდ დამთავრდეს
ოჯახური ძალადობა, სამუშაო ადგილებზე სექსუალური ხასიათის არასასურველი ქცევა, პოლიციის მხრიდან ძალის გადამეტება და ბავშვთა უფლებების დარღვევა - რა შინაარსის ზარები ხორციელდება სახალხო დამცველის „ცხელ ხაზზე“
ქართული პრესის მიმოხილვა 04.03.2024
„ფარმადეპოში“ გაზაფხულის ფასდაკლებები დაიწყო