პარლამენტის პლენარულ სხდომათა დარბაზის ყველა კარი დაკეტილია. შესაბამისად, საპარლამენტო ოპოზიციის დეპუტატებს, რომელთა მიმართვის საფუძველზეც პრეზიდენტმა პარლამენტის რიგგარეშე სხდომა დანიშნა, სასესიო დარბაზში შესვლის შესაძლებლობა არ ეძლევათ.

შესაბამისად, არ ტარდება არა თუ რიგგარეშე სხდომა, არამედ სხდომის გახსნისთვის საჭირო პროცედურა, რაც რეგისტრაციის გავლას ითვალისწინებს.

ოპოზიცია პლენარული სხდომის დარბაზის კარის გახსნას და რეგისტრაციის გავლის შესაძლებლობის მიცემას ითხოვს. ისინი მმართველ გუნდს შეახსენებენ, რომ ამ გადაწყვეტილებით ირღვევა, როგორც პარლამენტის რეგლამენტი, ისე საქართველოს კონსტიტუცია.

შეგახსენებთ, რომ 25 თებერვალს, 12:00 საათზე პარლამენტის პლენარული სხდომა დანიშნულია. სხდომის დღის წესრიგს უკრაინასთან დაკავშირებული საკითხი და ამ თემაზე პრემიერ-მინისტრის მოსმენა წარმოადგენს.