ნიკა კვარაცხელიას მკვლელობის საქმის პროკურორის განცხადებით, აღნიშნულ საქმეზე ბრალდებულ პირთა წრე „დიდი ალბათობით, გაიზრდება"
22 წლის ნიკა კვარაცხელიას მკვლელობის საქმის პროკურორის, გია შაიშმელაშვილის განცხადებით, აღნიშნულ საქმეზე ბრალდებულ პირთა წრე "დიდი ალბათობით, გაიზრდება".
შაიშმელაშვილის თქმითვე, ამ ეტაპზე გამოძიების მიერ კონკრეტული პირების მხილების მიზნით დამატებითი მტკიცებულებების შეკრება მიმდინარეობს, ნაწილთან მიმართებაში კი უკვე დამატებითი ინფორმაციის მოძიებაც ხდება.
რაც შეეხება დანაშაულის დაფარვაში ბრალდებულ ირაკლი ბიბინეიშვილს, როგორც საქმის პროკურორი აღნიშნავს, ის ბრალდებულებს - გიორგი კავილაძესა და აკო ჭელიძეს უსაფრთხო ადგილზე გადასვლაში დაეხმარა.
„კონკრეტულ შემთხვევაში, ბრალდების მხარის მიერ მოპოვებული და წარმოდგენილია მოწმეთა ჩვენებები, რომლის მიხედვითაც ბრალდებულმა იცოდა, რომ ორივე ბრალდებულს ჩადენილი ჰქონდა ნიკოლოზ კვარაცხელიას განზრახ მკვლელობა, მასთან სახლში მივიდნენ და ამ ყველაფრის მიუხედავად, ბრალდებულმა მათ თავშესაფარი მისცა, დაეხმარა, რომ გარკვეული პერიოდი მასთან ეცხოვრათ და სამართალდამცავ ორგანოებს დამალვოდნენ. ამ ყველაფრის შემდეგ მან ბრალდებულებს ტაქსიც გამოუძახა და მისცა საშუალება, რომ სხვა, უსაფრთხო ადგილზე გადასულიყვნენ", - განაცხადა შაიშმელაშვილმა.
