ზუგდიდის მუნიციპალიტეტის მერიასთან უკრაინის სოლიდარობის აქცია გაიმართა.ოპოზიციური პარტიების წევრებმა, ახალგაზრდებმა და არასამთავრობო ორგანიზაციების წარმომადგენლებმა კიდევ ერთხელ გამოხატეს უკრაინისადმი მხარდაჭერა და საქართველოს პრემერ-მინისტრის ირაკლი ღარიბაშვილის განცხადება დაგმეს, რომლის თანახმადაც საქართველო რუსეთის წინააღმდეგ სანქციებს არ უერთდება.
აქციის მონაწილეების თქმით, ღარიბაშვილის განცხადება არ გამოხატავს მოსახლეობის პოზიციას.
"დღევნდელი აქციის მიზანი იყო გაგვეპროტესტებინა ირაკლი ღარიბაშვილის პუტინისტური განცხადება. რომელიც მხოლოდ და მხოლოდ ემსახურებოდა ერთი ნათელი პოზიციის დაფიქსირებას, რომ ის დღეს დგას არ უკრაინის არამედ, რუსეთის გვერდზე. მერიასთან მოვედით იმიტომ, რომ დღეს ვნახე ზუგდიდის მერს მამუკა წოწერიას თავის გვერდზე გამოუქვეყნებია თავისი ფოტო უკრაინის დროშის „ფრეიმით“. მე მინდა მას ვუთხრა, რომ „ფრეიმის“ დაყენებით თქვენ არ ხდებით უკრაინის სოლიდარული. მოგიწოდებთ, შეუერთდეთ ხალხის მიერ დაორგანიზებულ აქციას",- განაცხდა პარტია "დროას" წევრმა მარიამ სიჭინავამ.
მერიასთან პოლიცია იყო მობილიზებული. მიუხედავად მათი წინააღმდეგობისა აქციის მონაწილეებმა შენობასთან უკრაინის დროშის გამოსახულებით სტიკერები გააკრეს.