„გირჩის“ დეპუტატის, სანდრო რაქვიაშვილის განცხადებით, საქართველოს შემთხვევაში სამხედრო ნეიტრალიტეტი ფიქციაა, რადგან შეუძლებელია იყო ნეიტრალური.
მისივე თქმით, თუ ვიღაც სერიოზულად განიხილავს, რომ რომელიმე ქვეყანა შეიძლება ნეიტრალური იყოს, ან არ ესმის რაზე საუბრობს, ან ტყუილს ამბობს.
„ყველაზე კარგი მაგალითი შვეიცარიაა, რომელიც გარკვეული პერიოდი მეორე მსოფლიო ომის მიმართაც ნეიტრალური რჩებოდა და საბოლოო ჯამში, თავისი ნეიტრალიტეტი დაარღვია. ნეიტრალიტეტზე მსჯელობა შეიძლება, მაგრამ ეს არის ფიქცია. საქართველოში პოლიტიკური სივრცე ფოკუსირებულია პიროვნებებზე. მიჩვეული არა ვართ, არგუმენტებით ვისაუბროთ, მათ შორის პარლამენტში დებატები გავმართოთ. ამიტომ თუ ვიღაც კარგად მომზადებული რუსი პროპაგანდისტია, შეიძლება, დისკუსიაში ისეთი უპირატესობა მოიპოვოს და ვინმე რამეში დააჯეროს და ამის გვეშინია. ეს პრობლემაა არა რუსეთის, არამედ ჩვენი, რადგან არ გვინდა ლაპარაკი. პირიქით, უნდა იყოს დისკუსია არა მხოლოდ ამ თემაზე, არამედ თავდაცვაზე და ყველა მიხვდება, რომ ეს ნეიტრალიტეტი საერთოდ სისულელეა“, - განაცხადა სანდრო რაქვიაშვილმა.