გორიდან უკრაინაში ჰუმანიტარული ტვირთის გაგზავნა გრძელდება. ამის შესახებ ინფორმაციას გორის მუნიციპალიტეტის მერია ავრცელებს.

მათივე ცნობით, გორის მუნიციპალიტეტის მერიაში შექმნილი შტაბიდან არამალფუჭებადი საკვები, ჰიგიენის საშუალებები და მედიკამენტები უკვე დახარისხებულია და გასაგზავნადაა გამზადებული.

„ჰუმანიტარული აქციის შესახებ გადაწყვეტილება საქართველოს პრემიერ-მინისტრს ეკუთვნის, რომელიც რეგიონის სახელმწიფო რწმუნებულებისა და მთავრობის რეგიონებთან ურთიერთობის დეპარტამენტის ჩართულობით, ერთობლივად ხორციელდება.

უკრაინის დასახმარებლად, ჰუმანიტარულ აქციაში აქტიურად ჩაერთო როგორც საჯარო უწყება, ასევე კერძო სექტორი და ორგანიზაციები.

სპეციალურად შექმნილ შტაბში, რომელიც გორის მერიის შენობაშია განთავსებული, უკვე რამდენიმე კვირაა ტვირთის შეგროვება ხორციელდება.

საქართველოს მთავრობის დახმარებით, 150 ტონაზე მეტი ჰუმანიტარული ტვირთი უკრაინაში უკვე გაიგზავნა”,- აღნიშნულია გავრცელებულ ინფორმაციაში.